Израелската војска го бомбардираше градот Газа денеска, пред планираното преземање на областа, а според Министерството за здравство на Газа, 123 лица се убиени во последните 24 часа. Од утрово досега се убиени 81 човек.
Израелската армија објави дека „одобрила“ план за освојување на градот Газа, најголемиот град на палестинската територија, како дел од новата фаза од офанзивата насочена кон поразување на Хамас и ослободување на заложниците.
Израелскиот премиер Бенјамин Нетанјаху ја повтори идејата, која ја изрази и американскиот претседател Доналд Трамп, дека Палестинците треба да ја напуштат областа.
„Тие нема да бидат протерани, ќе им биде дозволено да заминат“, изјави Нетанјаху вчера за израелскиот телевизиски канал i24NEWS.
„Сите оние кои се загрижени за Палестинците и велат дека сакаат да им помогнат на Палестинците треба да ги отворат своите врати и да престанат да ни држат предавања“, дополни тој цинично.
Бројот на жртви во последните 24 часа е најлош за една седмица, што дополнително го зголемува огромниот број жртви од речиси двегодишната војна.
Планираното израелско преземање на градот Газа, кој армијата на државата веќе го освои во раните денови од војната, веројатно ќе се случи во рок од неколку седмици, велат официјалните лица.