Учениците Марин Христоски и Алексеј Мицкоски од ООУ „Кире Гавриловски-Јане“ од Прилеп, под менторство на наставничката Соња Јорданоска, го освоија второто место на Европскиот квиз на пари за 2025 кој се одржа на 23 мај во Брисел.
Меѓународниот натпревар од областа на финансиската писменост, во конкуренција на европски земји, првото место го освоија ученици од Италија, а по македонските натпреварувачи беа учениците од Шведска.
На натпреварот во организација на Европската банкарска федерација учествуваа ученици од 13 до 15 години.
(МБА) го организира националниот натпревар и учеството на победничкиот тим на Европскиот квиз на пари.
Успехот на учениците и на нивниот ментор денеска на настан во Македонската банкарска асоцијација (МБА) којашто го организираше националниот натпревар им го честитаа и министерката за образование и наука Весна Јаневска и гувернерот на Народната банка Трајко Славески.
Министерката Јаневска истакна дека теми од финансиската писменост во нашиот образовен систем се изучуваат интегрирано, во повеќе предмети.
– Децата учат како да управуваат со парите, како да креираат буџет, како да пресметуваат ризици и освојувањето второ место во Брисел е доказ дека имаме успешно спроведување на програмите. Македонија и минатата и оваа година покажува дека изобилува со таленти односно со ученици кои освојуваат први до трети награди во големо количество, а МОН е тука да ги поддржи. Во новата законска регулатива предвидуваме поддршка и за учениците, но и за организаторите, кога има потреба, на меѓународни олимпијади или друг тип натпревари, рече Јаневска.
Маја Стевкова Штериева, претседателка на Македонската банкарска асоцијација, рече дека нашите ученици го освоиле второто место во конкуренција на околу 70.000 ученици од цела Европа откако победија и на Националниот квиз на пари.
– Во седум години, колку што Македонската банкарска асоцијација го организира овој настан, испраќаме македонски тимови на натпреварувањето во Брисел, четири пати сме биле меѓу првите три европски тимови. Тоа за нас навистина претставува големо задоволство и голема радост што децата се заинтересирани. Тоа придонесува за нивна финансиска едукација и воопшто за населението, изјави Штериева.