Украина ги избра своите претставници за Евровизија 2023 година. Поп дуото наречено „Творчи“ ќе биде новиот претставник на оваа земја.
Имено, настапот се емитуваше од засолниште во Киев, а победничката песна „Heart of Steel“ беше првата која официјално беше потврдена за натпреварувањето.
„Ќе се обидеме да направиме се за достоинствено да ја претставиме Украина“, рече членот на групата Ендрју Хукулиак.
Да потсетиме, иако на овогодинешниот натпревар победи украинската група Калушки, поради војната, следниот Евросонг ќе се организира во Ливерпул. Метро станица во Киев, која со месеци се користи како засолниште, сега беше претворена во ТВ студио.
За време на настапот, танчерите носеа гас-маски бидејќи на екраните се појавија знаци за предупредување за нуклеарно оружје, додека текстот: „Не плашете се да го кажувате своето мислење“.
„Не мислевме дека ќе победиме, но сакаме да им се заблагодариме на сите што не поддржаа, што ја слушаат нашата музика и што се борат на првата линија“, додаде Хукулиак.
Украина за прв пат учествуваше на Евровизија во 2003 година. Оттогаш, победи три пати и заврши надвор од првите десет само шест пати, што ја прави една од најуспешните земји на овој музички настан.
„Направивме се што е можно за ова натпреварување да биде во полн ек и уште еднаш да ги обедини Украинците околу овие важни избори за најголемата музичка сцена во Европа“, изјави за Би-Би-Си Оксана Скибинска, шефица на делегацијата на Евровизија.
Таа додава дека првата одлука била да се снима од прифатилиштето.
„Тоа нѐ увери дека самата претстава може да продолжи без прекин, бидејќи без разлика дали имавме предупредувања за воздушен напад, работата може да продолжи“, објаснува таа.
На музичкото натпреварување учествуваат вкупно 37 земји, а имаат рок до март да ги потврдат своите тимови и изведувачи за натпреварот. Големото финале за изборот за песна на Евровизија 2023 година ќе се одржи на 13 мај 2023 година.