Украина денеска негираше дека руска хиперсонична ракета го уништила одбранбениот систем „Патриот“ од американско производство за време на воздушен напад врз Киев, пренесува „Ројтерс“.
Руското министерство за одбрана го изјави ова вчера по ноќниот воздушен напад врз главниот град на Украина. Двајца американски официјални лица подоцна изјавија дека системот „Патриот“ најверојатно бил оштетен, но се чини дека не е уништен.
„Сакам да кажам: Не грижете се за судбината на системите Патриот“, изјави портпаролот на украинските воздухопловни сили Јуриј Ихнат за украинската телевизија, отфрлајќи ја можноста руската ракета Кинжал да го уништи системот „Патриот“.
„Да се уништи системот со некаков вид Кинжал е невозможно. Сè што ќе кажат таму може да остане во нивната пропагандна архива“, рече тој.
Како што наведе „Ројтерс“, системот „Патриот“ е еден од бројните софистицирани единици за противвоздушна одбрана што ги снабдува Западот за да ѝ помогне на Украина да ги одбие руските воздушни напади по инвазијата на Москва минатата година.
Рускиот претседател Владимир Путин ја пофали ракетата Кинжал како доказ за воената моќ на неговата земја.
Украина соопшти дека соборила шест ракети Кинжал во вторникот, но Русија тоа го негираше. Не беше јасно какво западно оружје користела Украина, а Пентагон не коментираше.