Украинската контраофанзива против руските сили беше „особено успешна“ во последните денови и украинските сили ги исполнуваат своите главни задачи, изјави во вторникот висок безбедносен функционер.
Коментарите на Олексеј Данилов, секретар на Советот за национална безбедност и одбрана на Украина, го претставуваат последниот позитивен чекор од Киев на едномесечната контраофанзива, иако Москва не ги призна придобивките на Украина.
Русија, која ја започна инвазијата во февруари 2022 година, сè уште држи делови од територијата во источна и јужна Украина, но украинскиот претседател Володимир Зеленски во понеделникот рече дека неговите сили постигнале напредок по „тешката“ недела.
„Во оваа фаза на активни воени дејствија, украинските одбранбени сили ја исполнуваат задачата број еден – максимално уништување на персонал, опрема, складишта за гориво, воени возила, командни пунктови, артилерија и воздушна одбрана на руската армија“, напиша Данилов на Твитер.
Последниве неколку дена беа особено успешни“, додаде Данилов, но не даде повеќе детали. Валери Шершен, портпарол на воената команда Јужна Таврија, изјави дека украинските сили напреднале околу два километри во правец на Бердјанск во јужна Украина, и покрај жестокиот руски отпор.
Украинската заменик-министерка за одбрана Хана Малиар во понеделникот изјави дека борбите се интензивирани околу источниот град Бахмут, кој руските сили го зазедоа во мај. Таа рече дека украинската армија вратила вкупно 37,4 квадратни километри територија во тешките борби минатата недела.
Портпаролот на армијата Андриј Ковалев во вторникот рече дека Украина продолжува да врши притисок врз руските сили северно и јужно од Бахмут и дека постигнала „делумен успех“ во тешките борби. Тој додаде дека украинската армија успева да се спротивстави на обидот за напредување на руските сили во правците Лиман, Авдиивка и Маринка во источна Украина.
Двете страни во конфликтот тврдат дека нивниот противник трпи големи загуби, но Ројтерс не можеше да ја потврди ситуацијата на бојното поле.
Русија во вторникот ја обвини Украина дека ја нападнала Москва со најмалку пет беспилотни летала и сите биле соборени или им биле блокирани сигналите, но главните аеродроми во руската престолнина морале да ги пренасочуваат летовите неколку часа.
Руски гранатирања убиле маж и жена во јужниот украински град Херсон во вторникот наутро, соопшти, пак, локалното обвинителство.