ДОГОВОРОТ што ќе го потврди крајот на војната меѓу Украина и Руската Федерација треба да се заснова на „мировната формула“ и да биде мултилатерален, односно потпишан не само од Украина и Русија, туку и од земјите гаранти, изјави украинскиот министер за правда Денис Маљуска.
– Договорот мора да биде сеопфатен и да ги регулира сите области погодени од војната. Условите на договорот мора да бидат јасни и правно обврзувачки, а самиот договор е ратификуван од парламентите на земјите што ќе го потпишат, посочи Маљуска на четвртиот состанок на советниците за национална безбедност во Давос, на кој се разговараше за 10-тата точка од Формулата за мир на претседателот на Украина Володимир Зеленски, која се однесува на крајот на војната.
Според него, Украина постојано се обидувала да се договори за меѓусебните односи со Русија и да подготви релевантен меѓународен договор. Сепак, додаде тој, Русија престана да го спроведува секој пат и го игнорираше, соопшти Министерството за правда.
– За нас не е прв пат, имавме договор за заедничка граница, голем договор за пријателство и соработка, меморандумот од Будимпешта и договорот од Минск, посочи министерот.
Маљуска нагласи дека „не можеме да правиме грешки од минатото“.
Министерството за правда потсетува дека на средбата во Давос учествуваа претставници на 83 земји и три меѓународни организации.
Претседателот Володимир Зеленски, кој веќе пристигна во Швајцарија, утре ќе се обрати на Светскиот економски форум во Давос.