Украинскиот министер за култура Александар Ткаченко денеска изјави дека поднесува оставка по „недоразбирање“ за користењето на јавните средства за културни проекти, додека Киев се обидува да ја спречи руската инвазија.
„Во четвртокот вечерта ја поднесов мојата оставка до премиерот Денис Шмигал, поради бранот недоразбирање за важноста на културата во време на војна“, напиша Ткаченко на Телеграм.
Ткаченко, кој не даде други детали за причините за неговата оставка, рече дека за време на војната, приватните и буџетските средства за културата не се помалку важни отколку за беспилотните летала, бидејќи културата е штитот на идентитетот и границите на Украина.
Украинскиот претседател Володимир Зеленски повика на разрешување на министерот во четвртокот вечерта, критикувајќи ја употребата на државниот буџет за културни проекти на сметка на одбраната.
„Во вакви времиња, максималното внимание на државата, а со тоа и државните ресурси, мора да биде посветено на одбраната“, рече Зеленски во своето секојдневно обраќање.
Украинскиот претседател додаде дека музеите, културните центри и телевизиските серии се важни, но сега има други приоритети.
„Најдете вонбуџетски средства, а не државни“, рече Зеленски.