Украина постигна договор дека претходната американска помош дадена на Киев нема да биде дел од минералниот договор што има намера да го потпише со Вашингтон, изјави вчера украинскиот премиер Денис Шмихал.
„Постигнат е договор дека документот не ја зема предвид помошта дадена пред неговото потпишување“, рече Шмихал во објава на Телеграм. Шмихал, кој минатата недела беше во САД за пролетните состаноци на Меѓународниот монетарен фонд и Светската банка, рече дека е постигнат добар напредок во договорот по средбата со американскиот секретар за финансии Скот Бесент.
„Најважно е што јасно ги дефиниравме нашите црвени линии, договорот мора да биде во согласност со европските обврски и не смее да биде во спротивност со Уставот и законите на Украина“, рече тој. Тој додаде дека правни тимови работат на документот, објави Ројтерс.
Советникот за национална безбедност на САД, Мајк Валц, изјави вчера дека ќе биде постигнат договор. На 18 април, двете страни потпишаа меморандум како прв чекор кон постигнување договор за развој на минералните ресурси во Украина, договор промовиран од американскиот претседател Доналд Трамп.
Иако двете страни беа подготвени да потпишат договор за соработка во областа на природните ресурси во февруари, тој беше одложен по судирот во Овалната соба меѓу Трамп и украинскиот претседател Володимир Зеленски.