Членовите на Управниот одбор на чело со претседателот на ФФМ, Муамет Сејдини си поделиле по 20.000 евра од колачот – премија за пласман на Европското првенство на македонската А фудбалска репрезентација.
Како што пишува авторот на спортската емисија, „Полн погодок“, а пренесува „Спорт 1“, вкупната добивка од премијата за 15. члена на УО изнесува 300.000 евра.
Тоа како што наведуваат изворите, е за нијанса помала сума од онаа која ја добија фудбалерите кои беа само резерви и не играа на еден од двата баражи за пласман, а го добија како дел од колачот од премијата вредна 3,2 милиони евра.
За потсетување, македонскиот репрезентативец и капитен на А фудбалската селекција, Горан Пандев вчера реагираше и во дел од своето обраќање, како да сакаше да открие за што станува збор.
„Доста се криевте зад резултатите на репрезентацијата, сигурно паметот уште ви е во огромните премии што ги поделивте на наш грб, на грбот на репрезентацијата, што гиневме за македонскиот дрес“, истакна во дел од своето обраќање Пандев.
