Естонската влада најави дека ќе престане со користење на рускиот гас до почетокот на новата грејна сезона оваа есен. Како што соопштија од Владата на оваа земја, постигнат е договор со Финска за изнајмување на пловечки терминал кој ќе овозможи увоз на течен гас.
„Денеска решивме да престанеме да купуваме руски гас. Не е можно да се продолжи со хранење на руската воена машина“, изјави естонската премиерка Каја Калас на прес-конференција.
Иако само 7% од естонската енергија е гас, најголемиот дел е увезен од Русија.
Да потсетиме, Литванија е првата членка на Европската унија која се откажа од рускиот гас на почетокот на април. Претседателот на таа земја, Гитанас Науседа, тогаш на Твитер напиша: „Ако можеме ние, може и остатокот од Европа!“.
From this month on – no more Russian gas in Lithuania 🇱🇹.
Years ago my country made decisions that today allow us with no pain to break energy ties with the agressor.
If we can do it, the rest of Europe 🇪🇺 can do it too!
— Gitanas Nausėda (@GitanasNauseda) April 2, 2022
Литванија ги повика сите членки на Европската унија да го следат нејзиниот пример и да престанат да зависат од гасот од Русија. Иако 47 отсто од гасот го увезува од Русија, Литванија би можела да се осмели на тој чекор бидејќи со години инвестира во терминали за течен гас (ЛНГ).