Сојузот на синдикати на Македонија (ССМ) на Први мај ќе организира протест, потврди за „Локално“ потпретседателот на ССМ и претседател на синдикатот за градежништво, Иван Пешевски.
„Уште се мислиш каде да уплатиш аранжман, во која кафеана да закажеш, каде да заминеш на пикник? Почни да планираш,“ порачаа од ССМ.
Протестот следи по претходната јавна седница на ССМ, која започна во Работничкиот дом на ССМ, а продолжи пред Собранието, Стопанската комора и заврши пред Владата. Членовите на највисоките тела на ССМ пред Владата побараа повлекување на одлуката за зголемување на минималната плата за 1.800 денари и намалување на платите на избраните и именуваните лица на ниво на минимална плата.
Од ССМ исто така побараа да запрат нападите врз синдикатите. Првиот синдикалец, Трендафилов, меѓу другото упати предлог до премиерот Христијан Мицкоски за заеднички да примаат минимална плата од 500 евра, а да се зголемат останатите плати за 100 евра.