Одлуката за прераспределбата на овие средства денес беше усвоена од Собранието на РС Македонија.
Со прераспределбата на средства помеѓу буџетските корисници и фондовите се обезбедија 7,25 милијарди денари или 118 милиони евра, првенствено за справување со енергетската криза, односно овозможување на сигурност во обезбедувањето со електрична енергија на граѓаните и бизнисот, како и покривање на трошоците за електрична енергија на институциите за нивно непречено функционирање и давање услуги на граѓаните.
– Со оваа Одлука за прераспределба на средства помеѓу буџетските корисници и фондовите за 2022 година обезбедуваме дополнителни средства за надминување на последиците од енергетската криза, подмирување на приоритетните обврски на буџетските корисници, пред се, по основ на електрична енергија, реализација на капиталните проекти во областа на културата, патната, водоводната и спортската инфраструктура, обезбедување дополнителни средства за исплата на државна помош и инфраструктурно уредување во зоните, обезбедување дополнителни средства во областа на здравството, социјалата и образованието за реализација на тековните програми, проекти и утврдени законски надлежности, дополнителни средства во областа на одбраната за модернизација и опремување на Армијата, исполнување на обврската за исплата на регрес за годишен одмор за вработените опфатени со Гранскиот колективен договор и слично, рече министерот за финансии Фатмир Бесими.
Тој додаде дека со Одлуката се обезбедуваат дополнителни 1,72 милијарди денари во програмата за справување со кризи, средства за ЕСМ за обезбедување на електрична енергија од домашни извори, се обезбедуваат средства за покривање на трошоците на електричната енергија во клучни сектори за да не дојде до прекин на електричната енергија во тие институции, како и 186 милиони денари за студентски оброк.