Од струшката полиција денес информираа дека се преземни сите неопходни мерки за безбедносно одвивање на верската манифестација ЕОРДИЈА-ЛИТИЈА, што утре од 15 до 19 часот ќе се одржи во Струга, а во чест на празникот Свети Ѓорѓија Победоносец.
Од таму појаснуваат дека во периодот од 4 до 6 мај претставници на СВР Охрид и ОВР Струга одржале работни состаноци со претставници на црквата „Св. Ѓорѓи“ во Струга, на кои им била нагласена потребата од доследно и дисциплинирано придржување до сетот мерки и препораки на здравствените органи и владините мерки за заштита од коронавирусот и при вршење на верските служби и други активности за време на литијата, црковните и другите лица строго да се придржуваат до одредбите за држење социјална дистанца и носење заштитни маски.
„Црковните претставници, кои беа во постојан контакт со МПЦ-ОА, информираа за планираните активности пред и за време на одржувањето на литијата, кои целосно се во согласност со сетот превентивни мерки и нагласија дека литијата ќе биде составена од локалното свештенство и монаштво. Посочија дека ќе бидат ангажирани други црковни лица и претставници на агенција за обезбедување, со цел непречено и безбедно одвивање на предвидениот верски настан“, стои во писмениот допис.
Се упати апел до верниците настанот да го следат од страна, без придружување кон поворката и целосно придржување до препорачаните хигиенско-безбедносни мерки со цел заштита на јавното здравје на населението од Ковид-19.
Минатата година, голем број од граѓаните сепак присуствуваа и во храмот на богослужбата, а се приклучија и кон поворката, иако митрополитот Тимотеј неколкупати од говорницата ги предупреди и апелираше да останат на едно место и со одржана дистанца од страна да ја следат поворката, која со моштите и иконата на Св.Георгиј продефилира низ градот.
Дел од присутните верници беа дисциплинирани и носеа маски, други стоеја на тротоарите и балконите, но имаше и такви кај кои воопшто не се забележуваше претпазливост, ниту загриженост поради вонредната состојба и вирусот.
Разочарување за ваквиот развој на настаните во Струга тогаш изрази и министерот за здравство, Венко Филипче.