Одлуката на водечката македонска опозициска партија СДСМ да не учествува на предвремените парламентарни избори на 5 јуни може да претставува сериозен удар не само за процесот на демократизација на земјата, туку и на нејзината стабилност и на нејзината европска иднина во целост, изјави за „Мета“, европратеникот и специјален известувач за Македонија, Иво Вајгл.
– Обвиненијата за неправилности, недостигот на транспарентот и одложувањето на имплементирањето на Договорот од Пржино треба сериозно да се разгледаат – оцени Вајгл.
Европратеникот сепак оцени дека не е доцна за да се создадат услови, кои ќе овозможат сите да учествуваат на изборите закажани за 5 јуни.
– Без разлика, се уште има доволно време за да се имплементираат некои од важните реформи и мерки со цел да се исполнат барањата на сите учесници во изборниот процес и за да се однесе земјата во понапредно ниво на демократија – рече Вајгл.
Специјалниот известувач оцени дека последните настани во земјата сериозно ја загрозуваат евроатлантската иднина.
– Европската комисија и Европскиот парламент, заедно со претставниците на САД вложија големи напори за да осигураат дека претстојните избори ќе и дадат шанса на земјата за нов почеток на патот кон евроатлантските интеграции. Оваа шанса сега може да биде пропуштена поради недостиг на волја, одговорност и подготвеност да се направи компромис во интерес на државата – заклучува Вајгл./извор Мета