Европската комисија во средата ја објави стратегијата за развој на лекови против Ковид-19 што предвидува одобрување на три лекови до октомври оваа година, со можност уште два да бидат одобрени до крајот на годината.
Слично на развојот на вакцините, Комисијата најавува дека ќе инвестира во истражување и иновации, во идентификување на нови ветувачки лекови и зголемување на производствениот капацитет. Ова вклучува заедничка набавка на лекови и создавање портфолио на перспективни лекови, како и потпишување на пред-договори со производителите, како што е направено со вакцината против Ковид-19.
– Вакцините спасуваат животи, но не можат сами да го искоренат Ковид-19. Треба силно да ја охрабриме работата на лекови за да ја ограничиме потребата за хоспитализација, да го забрзаме времето на опоравување и да ја намалиме смртноста, рече комесарот за здравство Стела Киријакидес.
„Пациентите во Европа и ширум светот треба да имаат пристап до првокласни лекови против „Ковид-19“, затоа поставивме три многу јасни цели: до октомври, ќе развиеме и одобриме три нови и ефикасни лекови, кои потенцијално можат да го променат текот на болеста“, додаде таа.
Комисијата најавува дека ќе создаде портфолио од 10 потенцијални лекови против Ковид-19 и до јуни годинава ќе ги идентификува петте најперспективни.
– Ситуацијата во многу оддели за интензивна нега ширум континентот останува критична. Треба да се фокусираме и на вакцините и на лековите како два моќни и комплементарни начини за борба против Ковид-19, рече потпретседателот на Комисијата, Маргиритис Схинас.
Схинас додава дека ЕУ во моментов има само еден одобрен лек за Ковид-19.