Холандските фудбалери на Ливерпул со нетрпение го очекуваат доаѓањето на нивниот сонародник Арне Слот во англискиот клуб Ливерпул. Кај „црвените“ играат Рајан Гравенберч, Коди Гакпо и Вирџил ван Дајк, на кој му беше врачена капитенската лента по заминувањето на Џордан Хендерсон.
Ван Дајк во неколку наврати изјави дека ќе направи се за да му помогне на новиот менаџер Слот. Тој ќе ја замени легендата Јирген Клоп.
„Имам уште една година од договорот. Јас сум капитен на клубот и јасно кажав дека ќе го поддржувам новиот тренер колку што можам. Со нетрпение го очекувам почетокот на следната сезона”, изјави Ван Дајк во интервју за холандските медиуми на стартот од кампот на „лалињата“ пред Европското првенство.
„Ќе има промени во составот, но сигурен сум дека можеме да постигнеме успех од нив. Веќе разговарав со него за тимот и за иднината. Сепак, во моментов сум целосно фокусиран на мојата репрезентација и на претстојното Европско првенство“.
Гравенберч е сигурен дека Слот веќе нема што да докажува во Феенорд, со кој во последните две години ја освои титулата и купот.
„Мислам дека може да има добро влијание врз мојата кариера. Тој е тренер кој сака неговиот тим да игра добар фудбал“, додаде 22-годишниот играч од средниот ред, кој минатото лето пристигна од германски Баерн (Минхен).