Холандскиот селектор Луис ван Гал изјави дека третманот на кој бил подложен поради агресивна форма на рак на простата бил успешен. 70-годишниот поранешен менаџер на Манчестер Јунајтед и Барселона ја откри својата дијагноза во ТВ емисија на почетокот на овој месец.
Ван Гал, кој е во третиот мандат како селектор на Холандија, треба да ја предводи репрезентацијата на Светското првенство во Катар подоцна оваа година, пред да биде заменет со Роналд Куман.
„Поминав низ сè. Имав 25 третмани. Потоа морав да чекам пет или шест месеци за да видам дали третманот функционира“, изјави Ван Гал за холандската новинска агенција АНП.
Репрезентацијата на Холандија ќе игра со домаќинот од Катар, Сенегал и Еквадор во групната фаза на Светското првенство во 2022 година, кое започнува во ноември.