Привремениот тренер на Манчестер Јунајтед, Руд ван Нистелрој изјави денеска дека клубот може повторно да биде незапирлив, но дека е потребно време и напорна работа.
Јунајтед го отпушти менаџерот Ерик тен Хаг во понеделникот поради лошите резултати бидејќи тимот се наоѓа на 14-тото место на табелата во Премиер лигата, а Ван Нистелрој вечерва ќе го води тимот против Лестер во Лига купот.
Ван Нистелрој играше за Јунајтед пет години, од 2001 до 2006 година и ја освои Премиер лигата, ФА Купот, Лига купот и Комјунити Шилд, а минатото лето се врати на „Олд Трафорд“ како помошник на Тен Хаг.
„Кога се вратив како помошник на Ерик, го направив тоа затоа што верував дека Манчестер Јунајтед може да се врати на нивото на кое беше кога бев играч. Сè уште верувам во тоа, но ќе биде потребно време и многу напорна работа. Го видовме потенцијалот на тимот оваа сезона, но не доволно често“, изјави Ван Нистелрој, пренесе BBC.
Тој оцени дека Манчестер Јунајтед може да биде незапирлив кога играчите, стручниот штаб и навивачите се обединети.
„Дури и привремено, голема чест е да го тренирам клубот што го сакам, колку и да бараат од мене“, изјави Ван Нистелрој.
Раководството на клубот сака да го ангажира тренерот на Спортинг Лисабон, Рубен Аморим, кој изјави дека се уште не одлучил дали ќе го преземе Јунајтед.