Европската унија работи напорно за да ги убеди Бугарија и Северна Македонија да го решат спорот и да го отворат патот за пристапни преговори со ЕУ за Северна Македонија и Албанија, изјави во Тирана еврокомесарот за проширување Оливер Вархеји.
Вархеји денеска е во Тирана по посетата на соседните Македонија и Бугарија.
Тој рече дека доцнењето на Брисел за отпочнување на разговорите за членство во ЕУ со владите на Тирана и Скопје ја доведува во прашање безбедноста и довербата во Унијата.
Во декември 2020 година, Софија го блокираше почетокот на пристапните преговори на Северна Македонија со ЕУ, инсистирајќи Скопје прво да ги исполни условите од Договорот за добрососедство со Бугарија и да ги признае бугарските корени на македонската нација и јазик.
„Безбедноста на ЕУ е загрозена и затоа треба да го направиме тоа сега (да ги започнеме пристапните преговори) и довербата во нас е доведена во прашање“, рече Вархеји на заедничката прес-конференција со албанскиот премиер Еди Рама.
Забрзувањето на процесот на прием на нови членки стана уште поитно за европските дваесет и седум по почетокот на руската инвазија на Украина.
„Крајно време е да го исполниме нашето ветување и да ја одржиме првата меѓувладина конференција што е можно поскоро“, напиша Вархеји на Твитер по разговорот со Рама.
Тој му се заблагодари на албанскиот премиер за силната поддршка за Украина.