Еден од највлијателните американски дневни весници, Вашингтон пост, започнува со отпуштање на приближно една третина од својата новинарска редакција. Потегот е претставен како „стратешко ресетирање“, насочено кон прилагодување на медиумот на новите технолошки трендови и променетите навики на публиката.
Главниот уредник Мет Мареј ја опиша одлуката како тешка, но неопходна за долгорочна одржливост на весникот. Според проценките, станува збор за околу 300 новинари, при што најпогодени ќе бидат спортската редакција, секторот за книги и литературна критика, како и мрежата на странски дописници. Весникот, сепак, не објавува официјални податоци за вкупниот број вработени или претплатници.
Оваа одлука доаѓа во период на пошироки отпуштања во рамки на Амазон, чиј основач Џеф Безос е сопственик на „Вашингтон пост“. Компанијата на крајот на јануари најави отпуштање на 16.000 вработени, по уште 14.000 намалени работни места претходната есен, како дел од напорите за оптимизација на трошоците и прилагодување кон влијанието на вештачката интелигенција.
Според листата на Форбс, Безос е четвртиот најбогат човек во светот, со проценета нето-вредност од околу 250 милијарди долари.
Мареј во средата одржал состанок со вработените, информирајќи ги дека кратењата се дел од поширока стратегија за стабилизирање на финансиската позиција и зајакнување на релевантноста на весникот. Во изјава што ја пренесе Fox News Digital, Безос нагласил дека целта е „Вашингтон пост“ повторно да влезе во фаза на раст, со поцврста финансиска основа и поголемо значење во секојдневниот живот на читателите.