Мрежата за заштита од дискриминација ја изразува својата остра реакција на предлогот на Комисијата за прашања на изборите и именувањата до Собранието за избор на Вецко Здравески како член на Комисијата за спречување и заштита од дискриминација (КСЗД). Според нив, изборот е направен на нетранспарентен начин, по партиски клуч, и без почитување на законски утврдените критериуми за стручност, што сериозно ја загрозува независноста и легитимитетот на ова важно тело за човекови права.
„Седницата на Комисијата за прашања на изборите и именувањата беше закажана без транспарентност – повикот за јавна расправа беше испратен во последниот работен ден пред нејзиното одржување, што ја ограничуваше можноста за учество на јавноста и експертската заедница. За време на излагањата на кандидатите, во салата немаше повеќе од 15% од вкупниот број на членови на Собранието. Кандидатот Вецко Здравески не ги исполнува критериумите за минимум седум години работно искуство во областа на човековите права, од кои пет години во областа на еднаквост и недискриминација,“ велат од Мрежата.
Тие дополнително укажуваат на фактот дека, од спроведеното интервју со кандидатот, е јасно дека Здравески нема релевантно знаење или разбирање на основите на дискриминацијата. „Недостатокот на чувствителност кон овие теми отвора сериозни сомнежи за неговата способност да постапува непристрасно и еднакво кон сите граѓани, особено кон маргинализираните заедници, кои се меѓу најчестите жртви на дискриминација,“ нагласуваат тие.
Дополнително, загрижувачки е и фактот дека кандидатот бил член на Комисијата за верификација на факти, позната како Комисија за лустрација, која беше остро критикувана од Европската унија поради злоупотреби и политички мотиви. „Европската комисија во 2015 година препорача прекин на процесот на лустрација поради неговата идеолошка и селективна примена,“ додаваат од Мрежата.
Тие исто така потсетуваат на обвинението против Здравески во случајот „Моќник“, поврзано со делувањето на Комисијата за лустрација. „Иако случајот беше затворен поради застареност на делата, тоа не значи дека е утврдена невиност. Таквото минато не само што не е квалификација за членување во ова тело, туку е сериозен аргумент против неговото именување,“ нагласуваат од Мрежата.
На крајот, тие апелираат до Собранието да не го изгласа предложениот кандидат, истакнувајќи дека неговата поврзаност со политичка партија со силно влијание во Собранието е дополнителен фактор кој ја зголемува загриженоста за неговата способност да ја исполнува улогата на заштитник на човековите права.