Крајот на 2G и 3G мрежите во Велика Британија ќе дојде во 2033 година, објави Би-Би-Си, повикувајќи се на владина одлука.
Датумот е избран по разговорите со мобилните оператори Vodafone, EE, Virgin Media, O2 и Three.
Во јули, BT, сопственикот на EE, откри дека планира да ја исклучи својата 3G мрежа уште во 2023 година, а 2G мрежата малку подоцна, но во тековната деценија.
Многу други компании, исто така, постепено почнуваат да ги напуштаат технологиите зад овие мрежи.
Основачот на Assembly Research Метју Ховит изјави за Би-Би-Си дека исклучувањето на двете застарени мрежи најверојатно ќе дојде порано.
Според него, владата треба да размислува за потрошувачите кои користат постари уреди како паметни телефони кои поддржуваат само 3G.
Некои други паметни уреди, исто така, сè уште поддржуваат само 2G поврзување.
Постепено, сепак, операторите го трансформираат спектарот – и додека пред години се користеше за 2G и 3G, сега главниот дел емитува 4G и 5G.