Британскиот премиер Кир Стармер изјави дека виртуелниот состанок, со кој претседава министерката за надворешни работи Ивет Купер, „ќе ги разгледа сите одржливи дипломатски и политички мерки што можеме да ги преземеме за да ја обновиме слободата на пловидба, да ја осигуриме безбедноста на заглавените бродови и морнари и да го продолжиме движењето на виталните стоки“.
Иранските напади врз комерцијални бродови, како и заканите од нови напади, речиси целосно го запреа сообраќајот во овој теснец, кој го поврзува Персискиот Залив со останатите светски океани, пресекувајќи критична рута за глобалниот проток на нафта и предизвикувајќи нагло зголемување на цените на нафтата.
САД не е меѓу земјите што ќе присуствуваат на состанокот во четврток. Доналд Трамп порача дека обезбедувањето премин низ овој теснец не е американска задача и им рече на сојузниците на САД „сами да си ја обезбедат сопствената нафта“.
Засега ниту една земја не изгледа подготвена да се обиде со сила да го отвори теснецот, додека борбите сè уште траат и Иран има можност да гаѓа пловни објекти со противбродски ракети, дронови, јуришни чамци и мини.
Сепак, Стармер во средата изјави дека воените планери од неутврден број земји наскоро ќе се состанат за да разработат начин за обезбедување на безбедноста на пловидбата „по завршувањето на борбите“.
Во меѓувреме, 35 земји, меѓу кои Обединетото Кралство, Франција, Германија, Италија, Канада, Јапонија и Обединетите Арапски Емирати, потпишаа изјава со која бараат од Иран да ги прекине обидите за блокада на теснецот и се обврзуваат дека ќе „придонесуваат со соодветни напори за обезбедување безбеден премин“ низ овој морски пат.
Денешниот состанок се смета за прв чекор, по кој ќе следуваат „работни состаноци“ на пониско ниво за да се договорат деталите.
Стармер порача дека обновувањето на поморскиот сообраќај „нема да биде лесно“ и дека ќе бара „обединет фронт на воена сила и дипломатски активности“, заедно со партнерство со поморската индустрија.
Идејата за меѓународен ангажман потсетува на меѓународната „коалиција на подготвените“, која, со водечка улога на Обединетото Кралство и Франција, беше формирана со цел по евентуален прекин на огнот да гарантира безбедност за Украина. Коалицијата делумно претставува обид да ѝ се покаже на администрацијата на Доналд Трамп дека Европа е подготвена да преземе поголем дел од одговорноста за сопствената безбедност.
Итноста за зајакнување на одбранбените капацитети на континентот дополнително беше нагласена со повторените навестувања на Трамп дека САД би можеле да се повлечат од НАТО.