Светскиот шампион во Формула 1, Макс Верстапен, го советуваше големиот ривал од минатата сезона Луис Хамилтон да го заборави поразот, бидејќи веќе има седум титули. Возачот на Ред Бул зборуваше за Би-Би-Си во Бахреин, каде викендов се одржува првата трка сезонава во Формула 1.
„Мислам дека Луис може да ја надмине болката од губењето на титулата минатата година, бидејќи веќе освои седум светски титули“, изјави Верстапен. „Но, мислам дека разговаравме за ова уште на крајот од минатата сезона“.
Макс го презеде водството пред Луис во последниот круг од минатогодишната последна трка, што дојде по контроверзната одлука на поранешниот тркачки директор на Формула 1, Мајкл Маси, пред рестартот за последниот спринт. Верстапен победи на трката, а Луис подоцна објасни дека таа била наместена.
ФИА ќе го објави извештајот посветен на деталната анализа на трката и одлуките на Маси. Хамилтон рече дека извештајот треба да биде објавен, но Верстапен не се согласува.
„Мислам дека спортот нема потреба од некаков третман. Она што се случи во финалето минатата година беа драматични моменти кои се дел од спортот, ништо повеќе“, прокоментира Верстапен.
ФИА се раздели со Маси, бидејќи шефот на Хамилтон и Мерцедес, Тото Волф, претходно остро го нападнаа Австралиецот, но тимот продолжува да негира дека извршиле притисок врз меѓународната федерација да го отпушти Маси.