Макс Верстапен е на добар пат да ја освои својата четврта последователна шампионска титула во Формула 1.
По 14 трки, асот на Ред Бул има 78 бода повеќе од вториот Ландо Норис од Мекларен. Сепак, во последните неколку трки е јасно дека Верстапен не е толку доминантен како во последните две сезони.
Мекларен забележа значителен напредок, а во конкуренција на конструктори се доближи до Ред Бул на само 42 поени.
„Доколку продолжат да победуваат, реално ќе бидат сериозна закана во борбата за титулата“, изјави Верстапен.
Сепак, Холанѓанецот смета дека Ред Бул треба повеќе да размислува за себе.
„Мораме да поправиме некои работи, да бидеме добри како на почетокот на сезоната. Се разбира, титулата е секогаш во потсвеста, но фокусот е автомобилот да функционира како што треба. Од тоа ќе произлезе се добро“, изјави Верстапен.
Шампионатот во Формула 1 продолжува на 25 август со трка во Зандворт.