Макс Верстапен вчера ги загуби своите први квалификации од почетокот на сезоната во Формула 1 и ќе мора да ја започне денешната ГН на Монако од шестото место на гридот.
Со оглед на речиси неможноста за претекнување во Кнежеството, оваа поназад стартна позиција повеќе или помалку го става светскиот шампион надвор од трката за победа. Но, овој разочарувачки резултат од квалификациите не беше изненадувачки со оглед на тешкотиите во управувањето на RB20 што го мачат Холанѓанецот од почетокот на викендот.
Од првиот тренинг во петокот тој се пожали на неспособноста на болидот на Ред Бул да ги нападне рабниците и нерамнините на уличната патека. Ова не е нешто ново за „биковите“, бидејќи слични проблеми ги мачеа минатата година, но тогаш нивната голема предност им овозможи да го замаскираат овој дефицит.
И според Верстапен, на тимот нема да му биде лесно да го реши овој проблем, бидејќи во овој момент не ни знаат што го предизвикува. Прогнозата на Холанѓанецот е дека дури и Ред Бул да дознае што е коренот на овој проблем, инженерите на „биковите“ нема да можат да најдат решение до крајот на оваа година.
„Треба прво да откриеме што е тоа, бидејќи очигледно не знаеме. Ќе работиме напорно да го најдеме проблемот и секако потоа ќе се обидеме да го поправиме, но не знам дали тоа ќе се случи оваа година. Се надевам дека ќе се случи за следната. Да знаевме што е проблемот, ќе го решивме. Знам дека има една јасна насока каде што мислам дека заостануваме, па ако најдеме решение таму, ќе бидеме брзи на секоја патека. Во Шпанија нема нерамнини, па таму ќе ни биде подобро, но има неколку патеки кои не се идеални за нас. Можеби ќе има трки кои повеќе ни одговараат, но мора да знаеме на што да работиме“, изјави Верстапен за новинарите во Монако.