Светскиот шампион во Формула 1, Макс Верстапен, изјави дека ќе почека да ги направи своите први вистински километри зад воланот на RB20 пред да донесе какви било заклучоци за можностите на новиот болид на Ред Бул.
Холанѓанецот веќе имаше можност да го вози болидот, но тоа беше за време на денот на снимање каде тимовите се ограничени на само 200 километри. Покрај тоа, тие користат специјални гуми кои не дозволуваат да се добие попрецизна идеја за можностите на автомобилот.
Така, единствена можност возачите навистина да се прилагодат на своите болиди се претсезонските тест денови, кои се само три на број. Тие ќе се одржат од среда до петок оваа недела, а реално секој возач ќе остане ден и половина зад воланот на својот болид пред почетокот на сезоната.
Имајќи ги предвид овие ограничени тестови, тркачите вложија огромна работа во симулаторот за да се подготват за секоја сезона. Според Верстапен, сепак, не постои начин да се добие точна претстава за однесувањето на автомобилот во симулаторот.
Дополнително, Холанѓанецот објави дека Ред Бул моментално работи на многу нови компоненти, што исто така не им дозволува на возачите да се навикнат на болидот.
„Овие работи се многу сложени за разбирање во симулаторот, но ниту тоа не беше нашата цел. Нашата идеја е да создадеме нов конкурентен автомобил. Јас самиот секако ќе дадам се од себе. Но, за тоа треба да се случат многу работи. Значи само времето ќе покаже колку сме навистина брзи“.
„Не смееме да ги заборавиме луѓето околу нас, тие учат се повеќе и повеќе. Не зависи само од нас како ќе помине сезоната. Ако има поголема конкуренција од другите тимови, ќе биде потешко да се победува на трки“.
„Не работев многу на целиот болид бидејќи постојано работиме на поединечни елементи од него за да се развиваме. Така што допрва треба да се фокусирам на тоа. Но, како и секогаш, претпочитам да го возам вистинскиот автомобил за да имам подобра основа за споредба со симулаторот. Но, засега сите во симулаторот се задоволни од податоците“, објасни Верстапен.