Лидерот на најголемата опозициска Демократска партија на Косово (ДПК), Кадри Весели, предупреди денеска дека во текот на првиот месец од владата на Албин Курти, биле повлечени две признанија за независност на Косово и дека новиот кабинет во тој период не покажал ништо друго освен ароганција за да ја оправда својата неподготвеност.
Весели на својот Фејсбук профил напиша по повод еден месец работа на косовската влада дека Курти го зголемил бројот на политички советници и имал вработено членови на семејството и екстремисти.
„Во триесетте дена од владата на Курти, бучавата и ароганцијата станаа средство за оправдана неподготвеност. Многу зборови се кажани само за да се избегне одговорност пред граѓаните. Но, владите и политичарите се мерат со работа, а не со зборови. Бројот на заменици министри се намалува, но разбирливо се зголемува бројот на политички советници. Постојат отпуштања без посебна причина, а се вработуваат членови на семејства и екстремисти во државни институции“, напиша Весели.
Курти ја обвини актуелната влада дека се заканува дека целосно ќе ги ослабне односите на Приштина со САД.
„Наместо да понудат безбедност и зајакнување на Косово во меѓународните односи, се случува спротивното. Закани и слабеење на односите со САД, покажување нервоза во односите со Албанија и изразување добра волја кон Србија“, напиша Весели.
Тој исто така предупреди дека две повлекувања од признавањето на независноста на Косово се случиле за само еден месец од владата на Курти.
„Еден месец на владата, две признанија за независност на Косово се повлечени. Тоа е огледало на овие 30 денови од владеењето, бучава, опасност и несигурност. Косово заслужува подобро”, рече Весели.