Шпанската полиција пукала во возач на камион кој што бил полн со плински боци за да го спречи да предизвика катастрофа во центарот на Барселона, соопштуваат медиумите.
Возачот Јоаким Робин Бергрен со брзина поголема од 100 километри на час возел по спротивна лента накај градот.
Полицијата неколку минути го следела, па се одлучиле да пукаат кон камионот за да го примораат возачот да застане пред да се предизвика поголема катастрофа.
Во текот на бркотницата неколку големи боци со плин испаднале од камионот, но немало експлозија. Меѓутоа, едно лице е повредено бидејќи една боца паднала врз автомобил кој бил во движење.
Полицијата соопшти дека возачот е уапсен, истакнувајќи дека се уште не се познати причините зошто возел кон центарот на градот, не соопштувајќи дали се работи за терористички напад или не.
Министерот за внатрешни работи на Шпанија, Хуан Игњасио Зоидо смета дека мала е веројатноста ова да е терористички акт, со оглед на тоа дека уапсениот, државјанин на Шведска, имал историја на психички пореметувања.