Премиерот на Република Македонија испрати видео порака по повод 15 септември, Меѓународен ден на демократијата, во која порача дека „сите ние, граѓаните на Македонија, заедно успеавме – ја одбранивме демократијата во Македонија. Македонија е слободна“.
„Организацијата на Обединетите Нации по чиј мандат се одбележува овој ден утврди дека темата за 2017 година е „Демократијата и превенцијата на конфликти“.
Пораката која ја пренесуваат владите е дека сите земји мора да работат на зајакнување на демократските институции кои ќе овозможат промоција на мир и стабилност.
„Ги учиме лекциите од непријатните моменти и конфликти кои ја загрозуваа демократијата во минатото. Денес слободно можеме да кажеме дека сите ние, граѓаните на Македонија, заедно успеавме – ја одбранивме демократијата во Македонија. Македонија е слободна“, порачува Заев.
Според него, Македонија го одбра концептот на поделба на власта на законодавна, извршна и судска, кои не смеат да се преклопуваат, што е механизам кој мора да се почитува за да се ограничи државната власт и за да се заштитат човековите права и слободи.
„Продолжуваме во остварување на непосредната демократија. Следуваат локални избори на кои граѓаните директно ќе одлучат на кого ќе му ја доверат довербата. Ќе обезбедиме услови за фер и демократски избори за сите граѓани на нашава земја директно да ја практикуваат најголемата придобивка на демократијата – ДА ОДЛУЧАТ ЗА СЕБЕ“, додава Заев.