Со цел јавно, транспарентно и директно информирање на јавноста ја објавуваме целосната снимка од интервјуто на д-р Жан Митрев дадено за екипата на ИРЛ. Интервјуто е автентично, без никакви интервенции и монтирање, велат од тимот на Митрев во соопштението до медиумите.
Потенцираат дека ги содржи сите прашања и одговорите од д-р Митрев, целосните одговори без сечење, лепење и комбинирање на одговори од различни прашања како би биле извадени од контекст и ставени во функција на намерата на ИРЛ да се оцрни и обвини докторот.
-На снимката јасно се гледа дека д-р Митрев е отворен да одговори и одговара на сите прашања и токму затоа бара неговите одговори да бидат објавени целосно без да се интервенира и без да се комбинираат одговори од различни прашања, со цел да се заштити вистината и фактичката состојба. Сепак сомнежите во намерите на ИРЛ и целта на правењето на овој документарец се потврдија затоа што токму тоа е направено во документарецот на ИРЛ, дадените одговори се сечени, лепени и комбинирани и вадени од вистинитиот контекст и ставени во друг, тенденциозен и далеку од вистината, стои во соопштението на тимот на д-р Митрев.
-Секое прашање можете да го објавите во целост, немам проблем со тоа. Проблемот е што досега кај некои новинари било извадено од контекст една реченица и да се фаворизира. За секое прашање што ќе ми го поставите, јас ќе ви одговорам и секое така одговорено можете понатаму да го објавите, вели докторот во видеото.
При снимањето на интервјуто, тимот на д-р Митрев вели дека ИРЛ вети дека целосната снимка ќе ја објави на Јутјуб, но иако поминаа шест месеци, тие не го објавија целосното интервју.
-Токму ова зборува за нивната интенција да се креира случај таму каде што нема и за тенденциозноста на целата приказна. Зошто ИРЛ го прави овој документарец, зошто во документарецот не се опфатени сите информации, зошто ИРЛ не ја објави целосната снимка од интервјуто? Одговорот на овие прашања е во снимката и настапот на екипата на ИРЛ пред отвореноста и целосната соработка на д-р Митрев и Клиниката Жан Митрев, стои во соопштението.