Владата на Република Македонија на денешната седница донесе одлукa за стопирање на владините реклами
Владата на денешната седница ја усвоила мерката од Планот 3-6-9 која се однесува на стопирање со владините реклами на комерцијалните радиодифузери и печатени медиуми, билборди, интернет портали (со исклучок на социјалните медиуми) и пренесување на комуникацијата со граѓаните преку јавниот радиодифузен сервис.
Согласно оваа мерка Владата на РМ донела заклучок според кој се задолжуваат сите органи на државната управа, им се укажува на институциите кои немаат статус на органи на државната управа и им се препорачува на единиците на локалната самоуправа да престанат да емитуваат, односно рекламираат кампањи/спотови на платен простор во електронски комерцијални радиодифузери – телевизии и радија, дневни и неделни весници, билборди, интернет портали, со исклучок на социјалните медиуми, согласно усвоената мерка од Планот 3-6-9.
Во однос на Планот 3-6-9, на денешната седница Владата ја разгледала и усвоила Информацијата за динамиката на реализација на одделни точки од планот и ги задолжуви институциите носители на мерките во Планот 3-6-9 да доставуваат извештаи за реализација на мерките до Секретаријатот за европски прашања секоја недела.