„СДСМ ќе ја поскапува струјата, и со тоа удира по џебот на граѓаните. Заев сака со парите на граѓаните да ги покрива дупките во енергетиката, од каде во изминативе 4 години само за ископ и транспорт во РЕК Битола се испумпани 200 милиони евра народни пари на сметки на фирми блиски до власта. Ова се пари кои доколку РЕК Битола набавеше сопствена механизација ќе беа заштедени“, соопштија од ВМРО-ДПМНЕ.
„Во периодот додека СДСМ беше опозиција жестоко обвинуваше за корупција и силно ветуваше прекин на ископ со приватни фирми во РЕК Битола. Меѓутоа откако СДСМ е на власт, во овие четири години пропаднаа обидите да се купи државна механизација и се остави широко поле за коруптивни тендери и сомнителни тендерски постапки за ископ на јаглен и јаловина во рудниците во РЕК Битолa.
Ако на ова се додаде поплавата предизвикана од неспособност, како и милионскиот интервентен тендер за багерот КУ 300 кој се хавариса по смислено сценарио, а и неразјаснетата хаварија на Блок 2 во Термоелктрани, после милионскиот тендер, исто така во четири очи за санација, а за кој мора да се спомене дека до денешен ден е надвор од производство, тогаш одговорот е јасен зошто состојбата со АД ЕЛЕМ е загрижувачка.
Се уште нема официјални извештаи за финансиската состојба за 2020 година, но од неофицијални информации се знае дека АД ЕЛЕМ ја завршила 2020 година со повеќе од 25 милиони ЕВРА загуба. Загубата е неминовна имајќи предвид дека главните приходи се од производството на електрична енергија кое во 2020 година е рекордно најниско од како постои АД ЕЛЕМ и изнесува 3.642,7 GWh. Извршено е партиско и рамковно превработување со партиски гласачи кои ништо не работат, а земаат високи плати. Трошоците се енормно високи, со извршени многу непотребни набавки.
МЕПСО до пред една година важеше за успешна профитабилна компанија. Сега за 2020 година излегоа податоци дека МЕПСО е во загуба од 6 милиони ЕВРА. За 4 години СДСМ успеа да ги банкротира ЕЛЕМ и МЕПСО. И сега сметката за расипништвото ја фрлаат на товар на граѓаните“, обвинија од Белата палата на опозициската партија.
„За време на 11 годишното расипничко владеење, ВМРО-ДПМНЕ го опустоши енергетскиот сектор. Додека Христијан Мицкоски како советник за енергетика на Никола Груевски спроведуваше погубни политики, државата беше зависна од скап увоз на струја, а на граѓаните им беше укината дневната евтина тарифа на електричната енергија“, реагираат од СДСМ.
„Заради таквиот расипнички однос, енергетскиот систем често се соочуваше со испади, по што цели населени места со денови беа без електрична енергија.
За разлика од нив, Владата предводена од СДСМ ја врати евтината дневна тарифа на струјата која обезбедува заштеди во семејните буџети.
Додека ВМРО-ДПМНЕ и како власт и како опозиција работи на штета на граѓаните и државата, Владата предводена од СДСМ државата инвестира во енергетиката и обновливите извори на енергија и води одговорни енергетски политики кои се признаени од Европската енергетска заедница и кои во разлноста даваат видливи резултати во развојот и унапредувањето на енергетскиот сектор“, посочуваат од партијата на власт.