ВМРО-Народна партија со изненадување ја прими веста дека веќе е во завршна фаза повторното пуштање во употреба на нафтоводот Солун – Скопје со цел да ѝ се помогне на Србија во нафтената криза, стои во соопштението на партијата.
ВМРО-Народна партија ја поздравува оваа иницијатива на Владата, меѓутоа, како што велат, не може, а отворено да не ја запраша македонската јавност и сите оние кои 25 години плукаа против тој проект, зошто сега молчат?
-Аргументите кои сега се кажуваат за тоа дека овој проект ќе и донесе предност на нашата држава важеа и пред 25 години, што укажува на тоа дека некој свесно 25 години ја оставил Македонија без економските бенефити и геостратешката предност врз која денеска сега се става акцент.
Она што е особено чудно е молкот и на тие што директно би ја почувствувале конкуренцијата како „Макпетрол“, „Македонски железници“ и бројните сопственици на приватни цистерни.
ВМРО-Народна партија констатира дека ваков македонски национален консензус за повторното пуштање на нафтоводот со цел да и се помогне на братска Србија, одамна немаме забележано во нашата земја па дури и кога се увезуваше отровен мазут кој притоа го дишеше цела Македонија, ниту пак во енергетската криза од пред неколку години не се спомена обновувањето на нафтоводот, а сега одеднаш тој е државен и национален интерес, порачаа од партијата на Љубчо Георгиевски.
На прашање на медиумите за состојбата во Србија и проблемите со нивната нафтена индустрија и дали би можеле да го снабдуваме јужниот дел од соседна Србија со деривати, премиерот Христијан Мицкоски вели дека ја разгледуваат секоја можност, но истакна дека „не се акционерско друштво за да ја снабдуваме јужна Србија или другите земји во регионот“.
Во врска со продуктоводот, Мицкоски рече дека Владата ги спроведува сите чекори тој да почне да функционира до крајот на оваа година.