Пејачот Тоша Проески трагично го загуби животот пред 15 години, но се уште живее во срцата на многу луѓе.
Особено тешко му е на неговиот внук Кристијан Ристески, кој тргна по стапките на својот вујко и се занимава со музика.
Кога беше помал, Кристијан сними и дует со Тошет наречен „My Little One“, а оваа песна беше објавена на постхумниот албум на пејачот „The Hardest Thing“.
Првиот голем музички пробив го направи во 2018 година, кога настапи на концертот во Македонија посветен на Проески.
Тогаш ја изведе својата песна We are blood (Ние сме крв) чиј текст трогна многумина.
„Бев во Лондон, во студиото на Енди Рајт, кој ги правеше аранжманите и ‘мастерингот’ за песните од постхумниот албум на вујко ми. Енди доби идеја да снимам песна. Долго размислував и се согласив. Решив да пеам за вујко ми. Текстот на песната се роди од нашите долги разговори за Тоше, поради што има толку симболично име – Ние сме крв“, изјави тогаш Ристески за медиумите.
Ова младо момче денес има 25 години и често на социјалните мрежи споделува спомени и фотографии на кои е со Тоше.