Во пресрет на празниците Велигден и Ѓурѓовден, Бугарската агенција за храна запрела 32 тони јагнешко месо, за кое велат дека било со сомнително потекло. Тамошното Бугарското национално здружение за овчарство пред неколку дена излегла со соопштение дека пред празниците во Бугарија биле внесени 200 тони јагнешко месо од Македонија, кое се продава за околу 14 лева (7 евра) за килограм и ја намалува цената на бугарските производители. Бугарските сточари дури подготвувале и протест, но откако добиле гаранција од официјалните власти за зголемена контрола, ја откажале оваа намера, пишува бугарски „Медиапул“.
„При целосен увид извршен денеска, откриени се погрешни практики во однос на потеклото на месото што го продава претпријатието“, наведуваат од Агенцијата за храна, стои во текстот.
Издадена е наредба да се докаже сообразноста на замрзнатото јагнешко месо со потекло од Македонија и да се информираат сите изведувачи кои го добиле македонското јагнешко месо за неговото потекло.
„На операторот ќе му бидат доставени два акти за утврдување административен прекршок, од аспект на следливост на примените серии и од аспект на погрешни информации за потеклото на месото“, соопштиле од тамошната Агенција за храна, пишува бугарскиот медиум.
Според податоците на Здружението за овчарство, поради евтиниот увоз од Северна Македонија минатата година, над 20.000 бугарски јагниња останале непродадени и сега ќе се случи истото.