Земјите-членки на ЕУ нема да плаќаат данок на додадена вредност (ДДВ) на вакцините против Ковид-19 и тестовите до крајот на 2022 година, одлучи Советот на ЕУ.
Советот на ЕУ ги усвои измените и дополнувањата на директивата за заеднички систем за ДДВ, што им овозможува на членовите привремено да не наплаќаат ДДВ на вакцините и тестовите за коронавирус, како и на тесно поврзани услуги.
Донесената мерка се однесува само на вакцините против Ковид-19 и ќе стапи во сила наредниот ден откако ќе биде објавена во Службениот весник на ЕУ.
Европската комисија, која предложи привремен нула ДДВ за вакцините и тестовите на крајот на октомври, ја поздрави одлуката на Советот и рече дека тоа значи олеснување за болниците, лекарите и поединците и исто така обезбедува подобар и поевтин пристап до алатките за превенција, откривање и лекување на коронавирус.
Во моментов, членките на ЕУ можат да применуваат пониски стапки на ДДВ за вакцините, но не и нулта стапка, додека намалената стапка не се однесува на тестовите.
Според изменетата директива, членовите ќе можат да применуваат пониска или нула стапка и на вакцините и на тестовите доколку тие така изберат.
Европскиот комесар за економија Паоло Џентилони ја поздрави новата регулатива и посочи дека тоа ќе придонесе за поевтинување на вакцините и тестовите.