Во Европската унија, месечните минимални плати помали од 1.000 евра им се исплаќаат на граѓаните во 13 земји и над 1.500 евра во шест земји. 21 од 27 земји-членки на ЕУ имаат минимални плати на национално ниво. Исклучок се Данска, Италија, Кипар, Австрија, Финска и Шведска.
Ова го покажуваат податоците на европската статистичка служба Евростат за јануари 2022 година.
Вреди да се одбележи дека повеќето од овие земји се наоѓаат главно во источните и јужните делови на ЕУ. Меѓу нив се Латвија со просечна минимална плата од 500 евра, Романија (515 евра), Унгарија (542 евра), Хрватска (624 евра), Словачка (646 евра), Чешка (652 евра), Естонија (654 евра), Полска (655 евра), Литванија (730 евра), Грција (774 евра), Малта (792 евра) и Португалија (823 евра).
Во две земји-членки платите се нешто над 1.000 евра. Тоа се Словенија со просечна минимална плата од 1.074 евра и Шпанија (1.126 евра).
Во останатите шест земји во Европската унија минималните плати се над 1.500 евра месечно. Во Франција минималната плата е 1.603 евра, во Германија 1.621 евро, Белгија (1.658 евра), Холандија (1.725 евра), Ирска (1.775 евра) и Луксембург (2.257 евра). Заедно со Шпанија, минималната плата во овие земји е повисока од минималната плата во Америка, која во јануари 2022 година изнесуваше 1.110 евра.
Меѓу земјите кои имаат минимална плата на национално ниво, разликата меѓу највисоката и најниската е речиси 7 пати. Меѓутоа, ако се земат предвид цените во различни земји, разликата станува помала – околу три пати.
