Општинските изборни комисии во Тетовско добиле потврда од вкупно 265 избирачки места дека гласањето во вториот круг од Претседателските избори е започнато во 7 часот и се одвива во најдобар ред. Во шесте општини во овој регион можност за гласање ќе имаат вкупно 181.933 граѓани со право на глас.
-Контактирано е со сите избирачки места и од сите е добиена информација дека гласањето е започнато навремено уште во 7 часот. Секаде се одвива непречено, веќе се бележат и првите гласачи, а за излезноста ќе имаме податоци по 10 часот, изјави Артан Адеми, претседател на ОИК Тетово.
Општина Тетово има најмногу, 83.367 гласачи, распределени на 117 избирачки места. Во Боговиње има 27.501 гласач и 38 избирачки места. Општинска изборна комисија Желино има 23.510 гласачи, а бројот на избирачки места е 35.
Теарце брои 22.116 гласачи и 30 избирачки места. Во Брвеница на 24 избирачки места каде ќе може да гласаат 15.268 граѓани. Најмала по бројност е општина Јегуновце каде што се регистрирани 10.171 гласач и 21 избирачко место.