Армијата на рускиот претседател Владимир Путин има повеќе сличности со трупите на нацистичка Германија, отколку со Црвената армија која во Втората светска војна го запре Хитлеровиот режим. Ова го изјави Максимилијан Андроников, познат по прекарот Цезар, командант на Легијата на слободата за Русија – доброволна руска единица која се бори на страната на Украина.
Во интервју за британскиот весник The Times, дадено од тајна локација, Андроников го обвини Путин дека го злоупотребува историското сеќавање за победите над нацизмот, како оние во Курск и Сталинград, за да го поткрепи, како што го нарекува, својот „фашистички“ режим.
„Злосторствата на руските војници во Украина личат на дејствијата на нацистите, а режимската пропаганда и симболите потсетуваат на оние од Третиот рајх“, изјави Андроников. „Се бориме против руската верзија на нацизмот, кој го негира постоењето на украинската држава, култура, јазик и правото на народот да одлучува за својата иднина.“
Легијата, која Кремљ ја означи како терористичка организација, брои неколку стотици борци – претежно Руси кои живееле во Украина пред инвазијата во 2022 година, како и оние што подоцна се придружиле со цел да се борат против руските сили. Според Андроников, некои членови на руската војска, па дури и луѓе од владини и безбедносни структури, тајно ги поддржуваат нивните активности.
„Не сме сами. Имаме поддршка и од внатре – луѓе кои ни доставуваат информации. Верувам дека тоа ќе придонесе за соборување на режимот“, вели тој.
Максимилијан Андроников, поранешен фитнес тренер од Сочи, е баран од руските власти поради учество во упад на руска територија во 2023 година. Доколку биде фатен, се соочува со затворска казна до 20 години. Тој се претставува како руски националист кој се залага за демократија и го обвинува Путин дека од етничките Руси прави „вооружени робови“.
„Путиновата Русија може да се гордее само со ракети“
Во пресрет на прославата на Денот на победата во Москва, Андроников ја критикуваше трансформацијата на празникот во демонстрација на воена моќ, за која вели дека е обид да се манипулира со националното сеќавање. Потсети дека по 1945 година, парадите за овој празник се одржале само три пати во Советскиот Сојуз, сè до 1994 година кога станале редовен настан, а од 2008 година Путин ги претвори во спектакли со прикажување на нуклеарна и конвенционална сила.
„Каква е таа гордост кога Германија, некогаш поразена, денес е демократска и развиена држава, додека Русија живее во сиромаштија и се гордее со тоа што убила жени и деца во Украина?“, праша тој.
Како симбол на, според него, болната реторика на Кремљ, Андроников го спомена случајот од сибирскиот град Кемерово, каде што бебиња беа облечени во советски воени капи како дел од парадата.
„Русите не се бунат лесно, но кога ќе се кренат…“
Иако признава дека засега нема знаци за масовен револт против Путин, Цезар е убеден дека ќе дојде денот кога Русите ќе се ослободат од режимот.
„Русите не се како Украинците – тие не се бунат веднаш. Но, кога ќе се кренат, нема да има каде да се сокријат оние што го бранеа Путин“, рече тој. „Тоа ќе се случи. Само е прашање на време. А ние работиме на тоа секој ден.“