Израелската војска соопшти дека погодила повеќе од 400 цели во Појасот Газа по истекот на примирјето вчераутро, при што загинале 240 луѓе во нападите, според владата предводена од палестинската исламистичка група Хамас.
Хамас во соопштението додаде дека уште 650 лица се ранети во израелските воздушни, артилериски и поморски напади врз Појасот Газа.
Израелските сили најмногу го гаѓаа Кан Јунес во јужниот дел на Газа, каде што беа уништени десетици куќи, а луѓето внатре биле убиени, додаде Хамас.
Израелската армија во соопштение наведе дека со борбени авиони „погодила“ повеќе од 50 цели во областа Кан Јунис.
„Војниците на израелските одбранбени сили ги погодија терористите и инфраструктурата на Хамас во областа Беит Лахиа“, додаде израелската војска.
Артилерија и воздушни напади беа насочени и кон северот на Појасот Газа, се додава во соопштението.
Целта на армијата беше „терористички ќелии“, „џамија што ја користи Исламскиот џихад како команден центар“ и комплекс за складирање оружје, се додава во соопштението.
Покрај тоа, инфраструктурата и опремата што ја користат поморските сили на Хамас беа цел на јужниот дел на Газа, соопшти израелската војска.
Израел и Хамас меѓусебно се обвинуваат за кршење на еднонеделното примирје со кое се овозможи ослободување на стотици заложници во замена за ослободување на 240 палестински затвореници и забрзана испорака на хуманитарна помош за населението во Појасот Газа.