Британската армија не е доволно силна за долгорочна одбрана на Украина, изјави поранешниот британски министер за одбрана Бен Волас, предупредувајќи дека Лондон би можел да го задржи присуството на своите војници на терен само кратко време доколку се постигне мировен договор.
Во разговор за BBC Radio 4, Волас рече дека рускиот претседател Владимир Путин нема да биде „обесхрабрен“ од уверенијата дека британските сили можат да гарантираат почитување на потенцијалното примирје.
Тој оцени дека Германија во моментов е единствената голема европска сила што сериозно ги зголемила трошоците за одбрана.
„Германија досега значително го зголеми својот воен буџет двапати. Единствените сили во Европа кои правилно ги зголемуваат своите воени буџети, наместо да издаваат соопштенија за медиумите и да се вклопуваат во буџетите на другите луѓе и да се преправаат дека тоа е нивна одбрана, се Германија, Полска и нордиските земји“, истакна Волас, според британски Телеграф.
Како што наведе тој, покрај Германија, Полска и нордиските земји исто така спроведоа значително зголемување на воените буџети, додека британската влада планира да ги намали воените трошоци за милијарда фунти оваа година, што, според Волас, дополнително ги ослабува нејзините капацитети.
Волас ја повика владата на британскиот премиер Кир Стармер итно да ги зголеми трошоците за одбрана и да ги исполни своите обврски кон НАТО, вклучително и целта од 3,5 проценти од БДП. Тој нагласи дека одложувањето на ваквите одлуки го поткопува кредибилитетот на Велика Британија.
Поранешниот британски министер за одбрана, исто така, оцени дека неодамнешните изјави на американскиот претседател Доналд Трамп за Гренланд се во корист на руските интереси, бидејќи, како што наведе, му даваат можност на Путин дополнително да ја ослабне и подели НАТО алијансата.
Според него, Велика Британија треба порешително да застане во одбрана на Данска и Гренланд, предупредувајќи дека секој напад врз територијата на членка на НАТО би имал сериозни последици за иднината на Алијансата.
Изјавата доаѓа откако Велика Британија, Франција и Украина потпишаа заедничка декларација во Париз за формирање мултинационални сили кои, во случај на прекин на огнот, би биле распоредени во Украина за да го зачуваат мирот и да спречат нова руска агресија.
Планот, кој вклучува формирање воени логистички центри, за прв пат има поддршка од Соединетите Американски Држави.