Попладнево дошло до вооружен инцидент во близина на полициската станица „Бит Пазар“ во Скопје. Според првичните информации, едно лице завршило со потешки повреди и моментално се наоѓа на комплексот клиники „Мајка Тереза“.
На местото на настанот се испратени дополнителни полициски сили, додека истрагата е во тек.
Се огласија и од МВР. Оттаму велат дека полицајци излегле на местото и било констатирано дека се работи за престрелка помеѓу две групи од по пет до шест лица.
-Денеска околу 14.00 часот во СВР Скопје е пријавено дека на ул.„Војдан Чернодрински“ на подрачјето на Бит Пазар има пукање од огнено оружје. На местото на настанот најдени се повеќе чаури, а оштетени се неколку изложни стакла од продажни објект и околните продавници и неколку паркирани возила, појаснија од МВР.
Според дел од медиумите на албански јазик во земјава, ранет е 30-годишник од Арачиново, со повеќе рани на главата и градите. Неофицијално, претходна расправија довела до немилиот инцидент.
Повеќе детали се очекуваат во текот на денот.