Воздухопловните сили на САД имаат намера да купат две копии од електричниот пикап „Tesla Cybertruck“ исклучиво за да се користат како цели за прецизно тестирање на оружје.
Според „The War Zone“, Тест-центарот на воздухопловните сили на САД (AFTC) поднел барање за купување 30 возила за тестирање на ракетниот полигон „Вајт Сендс“ во Ново Мексико. Листата на возила вклучува седани, пикапи, кросовери и комбиња, но само две ставки наведуваат специфична марка и модел, а тоа е „Tesla Cybertruck“.
Документацијата наведува зошто се потребни овие специфични возила.
„Намерата е да се користат специфични возила „Tesla“ за тестирање како подготовка за борбени операции. Во реални услови на конфликт, непријателот може да користи „Tesla Cybertruck“, бидејќи набљудувањата покажаа дека тие не претрпуваат очекувано ниво на штета за време на сериозни судири. Потребно е да се моделираат сценарија што е можно поблиску до реалноста“, се вели во соопштението.
Воздухопловните сили на САД очигледно сакаат да бидат сигурни дека нивното прецизно оружје може да погоди и уништи цели како „Cybertruck“, и покрај неговата необична издржливост.
Извршниот директор на Tesla Елон Маск, претходно нагласи дека Cybertruck е „отпорен на куршуми“ и дека „може да ја преживее апокалипсата“. Исто така, тој неколку пати изјави дека електричниот пикап е погоден за воени задачи, па дури и ѝ го понуди на американската армија. Сепак, се чини дека првите примероци сепак ќе се користат како цели за уништување.