Дејвид Лохриџ, поранешен вработен во OceanGate, испратил е-пошта пред неколку години на друг поранешен вработен во компанијата во која ја изразил својата загриженост за можни дефекти на подморницата Титан.
„Не сакам да ме доживеат како оговарач, но толку сум загрижен дека тој ќе се убие себеси и други во потрагата за зајакнување на своето его“, напишал Лохриџ за извршниот директор на OceanGate, Стоктон Раш.
Компанијата организираше туристички патувања до остатоците од Титаник стари 111 години по цена од 250.000 долари. Лохриџ работел како независен изведувач за OceanGate во 2015 година, а потоа и како вработен помеѓу 2016 и 2018 година, објави Си-Ен-Ен. Наскоро тој се вплеткал во судски спор со OceanGate, тврдејќи дека бил неправедно отпуштен затоа што покренал загриженост за безбедноста и тестирањето на Титан.
„Би се сметал себеси за прилично храбар кога станува збор за правење работи кои се опасни, но таа подморница е несреќа која чека да се случи. Не би можеле ниту да ми платат за да нуркам со таа подморница“, напишал Лохриџ во е-пошта до Роб МекКалум, соработник на проектот.
МекКалум, кој ги водеше експедициите на Титаник, го предупредил Раш во 2018 година за безбедноста на подморницата Титан, велејќи му на извршниот директор дека се става себеси и неговите клиенти на ризик.
OceanGate беше околу еден час и 45 минути во планираното нуркање за да дојде до остатоците од Титаник кога изгуби контакт со својот матичен брод на 18 јуни.
Неколку дена подоцна, официјални лица потврдија дека Титан претрпел „катастрофална имплозија“. Загинаа сите пет членови на екипажот: Раш, британскиот бизнисмен Хамиш Хардинг, францускиот нуркач Пол-Анри Наргеолет, пакистанскиот милијардер Шахзада Давуд и неговиот 19-годишен син Сулеман Давуд.