Американските работодавци нагло го зголемија темпото на вработувања во септември, отворајќи 50 отсто повеќе работни места отколку претходниот месец и повеќе од просекот во претходните 12 месеци, објави во петокот Министерството за труд.
Во септември беа отворени 336 илјади нето нови работни места во најголемата светска економија, по ревидираните 227 илјади во август и 236 илјади во јули.
Новите податоци покажуваат дека во претходните два месеци се отворени 119.000 работни места повеќе отколку што покажуваа претходните проценки на министерството.
Податоците за септември се повисоки од месечниот просек во претходните 12 месеци, кој изнесуваше 267.000 нововработени.
Најмногу нови работни места се отворени во септември во секторот за одмор и угостителство, како и во здравството. Се зголеми вработеноста во стручните, научните и техничките служби, како и во системот на социјална заштита.
Во претходните 12 месеци, секторите за слободни активности и државните служби значително го надминаа просекот.
Приватниот сектор отвори 263.000 нови работни места, а државата 73.000, покажуваат податоците на министерството.
Стапката на невработеност е 3,8 отсто, исто како и во август, со речиси непроменет број невработени, приближно 6,4 милиони.
Просечната плата за час се зголеми за 0,2 отсто од август на 33,88 долари. Во однос на истиот месец лани, зголемена е за 4,2 отсто.