Претседателот на Србија, Александар Вучиќ, по повод забраната од страна на судот во Приштина за истакнување српски знамиња за Видовден во Косово, ги замоли сите што утре одат на Косово, да не му даваат можност на Аљбин Курти да ги апси, велејќи дека ќе дојде време кога ќе можат да носат српски кошули и знамиња насекаде сосема слободно.
„Ги замолувам сите млади мажи и жени што одат на Косово и Метохија, да не му даваат можност на Курти да ги апси. Знаете ли колку Срби извлековме од затвор, се мачевме да успееме…“, изјави Вучиќ за ТВ Пинк од Крушевац, каде што присуствуваше на вечерната служба во црквата Лазарица во пресрет на Видовден.
Претседателот Вучиќ потсети дека дури и на неговиот постар син на Косово цевката од автоматска пушка му била ставена на слепоочницата само поради маицата „Нема предавање“.
„Ќе дојде време кога ќе можеме да носиме српски маици и српски знамиња насекаде, сосема слободно, и затоа е важно да се зачува мирот и стабилноста низ цела Србија“, рече Вучиќ.
Тој изрази благодарност до Србите кои, посочи, страдаат од невиден терор, но и покрај тоа тие остануваат и преживуваат и го зачувуваат српското име и презиме во Косово.
„Тука сум да ја изразам мојата огромна благодарност до бесмртните херои на Косово за сè што направија за српската држава. Сега од нас зависи да ја браниме од надворешни напади и да ја зачуваме нашата единствена татковина што ја имаме, Србија“, рече претседателот Вучиќ.