Српскиот претседател Александар Вучиќ изјави дека нема да има спас за винската индустрија на Србија освен ако не почне да извезува од 15 до 30 милиони шишиња годишно во Кина, објави РТС.
„Само треба да обезбедиме што е можно поголем извоз во Кина и тогаш винската индустрија ќе може да преживее“, рече Вучиќ вчера, додавајќи дека производството на вино во Европа полека опаѓа, а Европејците сè повеќе ги намалуваат лозјата.
Тој истакна дека е невозможно истовремено да се влезе на францускиот и италијанскиот пазар, кои, заедно со САД, се најголемите производители на вино во светот.
„Премногу сме мали за нешто вакво. И затоа Кина е од големо значење за нас“, нагласи Вучиќ.
Српскиот претседател вчера објави дека кредитите за поддршка на производството на вино, пиво и жестоки пијалоци ќе бидат зголемени од 10 милиони динари (85.191,3 евра) на 20 милиони динари (170.382,6 евра).
Вучиќ истакна дека ова се исклучителни услови што треба дополнително да ја поттикнат работата на српските дестилерии, винарии и пиварници. Тој додаде дека во последните години Србија постигнала значителен напредок и во бројот и во квалитетот на своите дестилерии и винарии.