Српскиот претседател Александар Вучиќ разговарал по телефон со унгарскиот премиер Виктор Орбан, продолжувајќи го, како што рече, „суштинскиот дијалог, воден во четврток во Суботица“.
„Како што вети, ме информираше за неговата средба во Москва. И, во оваа пригода, нагласи дека Унгарија ќе помогне во енергетската стабилност на Србија.
Добрососедските односи меѓу Србија и Унгарија значат многу за двете земји и народи. Подготвен сум да продолжам да го давам мојот најголем придонес кон нашето пријателство“, напиша Вучиќ во објава на Инстаграм.
Премиерот Христијан Мицкоски, пред три дена, одговарајќи на прашање за состојбата во Србија и проблемите со нивната нафтена индустрија, рече дека ја разгледуваат секоја можност, но истакна дека „не сме акционерско друштво за да ја снабдуваме јужна Србија или другите земји во регионот“.
Имено, тој беше прашан дали Владата ја следи состојбата со нафтената индустрија во Србија и дали земјава ќе го активира продуктоводот, односно нафтоводот од Солун до Скопје и на тој начин да ја искористи ситуацијата со НИС, односно да го снабдува, на пример, јужниот дел на Србија со нафтени деривати и на тој начин земјава да инкасира средства плус.