Социјалната мрежа Х, порано позната како Твитер, ја отстрани објавата која го негира холокаустот по критиките од музејот во Аушвиц. X првично објави дека објавата не ги прекршила правилата.
Навредливата публикација беше одговор на публикацијата на музејот за тригодишно еврејско девојче убиено во гасните комори на концентрациониот логор. Избришаната објава нејзината смрт ја нарече бајка, а содржеше и навредливи стереотипи за Евреите, пишува Би-Би-Си.
Правилата на X велат дека негирањето на холокаустот е забрането. Најмалку 1,1 милион луѓе беа убиени во концентрациониот логор Аушвиц во Полска, а речиси еден милион од нив беа Евреи. Музејот пишува дека меѓу убиените има повеќе од 200.000 деца и млади луѓе.
20 August 1939 | A French Jewish girl, Renee Kaufman, was born in Paris.
In September 1942 she was deported to #Auschwitz from Drancy and murdered in a gas chamber after the selection. pic.twitter.com/gdz0tuQAuA
— Auschwitz Memorial (@AuschwitzMuseum) August 20, 2023
Одбиле да ја тргнат објавата, подоцна се предомислиле
Музејот ја пријавил спорната објава, но добиле одговор од Х во кој се вели дека по прегледувањето на достапните информации, платформата заклучила дека не се прекршени никакви правила.
Музејот потоа повторно се пожалил, по што добиле нов одговор во кој се тврди дека настанала грешка и дека објавата била отстранета по повторени анализи.
Иако објавата со која се негира геноцидот беше отстранета, профилот што го објави сè уште беше достапен, но потоа беше суспендиран. Тој имаше 20 следбеници и други објави кои може да се сметаат за навредливи.
Елон Маск, кој се опишува себеси како поборник за апсолутна слобода на говор, негира дека има зголемување на објавите со омраза откако го презеде Твитер. Во декември тој тврдеше дека говорот на омраза е намален за една третина.